ಒಂದು ಲಾರಿ, ಒಂದು ಕೋಟಿ ಮೌಲ್ಯದ ಅಡಿಕೆ! 300 ಕೋಟಿ ವ್ಯವಹಾರ ನಡೆಸೋದು ಹೇಗೆ ಗೊತ್ತಾ? | ಎಲ್ಲೂ ಸಿಗದ ಸ್ಟೋರಿ! | Malneadu today Sepical
One lorry, arecanut worth Rs 1 crore! Do you know how
One lorry, arecanut worth Rs 1 crore! Do you know how / ಒಂದು ಲಾರಿ, ಒಂದು ಕೋಟಿ ಮೌಲ್ಯದ ಅಡಿಕೆ! 300 ಕೋಟಿ ವ್ಯವಹಾರ ನಡೆಸೋದು ಹೇಗೆ ಗೊತ್ತಾ? | ಎಲ್ಲೂ ಸಿಗದ ಸ್ಟೋರಿ! | Malenadu today story / SHIVAMOGGA
ಇತ್ತೀಚೆಗೆ ಬೆಳಗಾವಿಯಲ್ಲಿ ಶಿವಮೊಗ್ಗದಿಂದ ಹೊರ ರಾಜ್ಯಕ್ಕೆ ಸಾಗಿಸಲಾಗುತ್ತಿದ್ದ ಅಡಿಕೆ ಲಾರಿಗಳನ್ನ ಹಿಡಿಯಲಾಗಿತ್ತು. ಅಕ್ರಮವಾಗಿ ಅಡಿಕೆಗಳನ್ನು ಜಿಎಸ್ಟಿ ನೀಡದೇ, ಸಾಗಿಸುತ್ತಿದ್ದ ಹಿನ್ನೆಲೆಯಲ್ಲಿ ಬೆಳಗಾವಿಯ ಜಿಎಸ್ಟಿ ಅಧಿಕಾರಿಗಳು, ವಾಹನಗಳನ್ನ ಸೀಜ್ ಮಾಡಿದ್ದರು. ಐದು ಲಕ್ಷ ರೂಪಾಯಿ ಜಿಎಸ್ಟಿ ಕಟ್ಟದೇ, ಅಡಿಕೆಗಳನ್ನ ಲಾರಿಗಳಲ್ಲಿ ಸಾಗಿಸುತ್ತಿರುವುದು ಅಧಿಕಾರಿಗಳ ರೇಡ್ ವೇಳೆ ಪತ್ತೆಯಾಗಿತ್ತು.
ಸಾಮಾನ್ಯವಾಗಿ ಒಂದು ಲಾರಿ ಲೋಡು ಅಡಿಕೆಯಲ್ಲಿ, ಅಂದಾಜು ಒಂದು ಕೋಟಿ ಮೌಲ್ಯದ ಅಡಿಕೆಯಿರುತ್ತದೆ. ಅಷ್ಟೊಂದು ಪ್ರಮಾಣದ ಅಡಿಕೆಯನ್ನು ಸಾಗಿಸುವಾಗ ಕನಿಷ್ಟ 5 ಲಕ್ಷ ಜಿಎಸ್ಟಿಯನ್ನು ಕಟ್ಟದಿರಲು, ಅಡಿಕೆಯ ಮಾಲೀಕರಿಗೆ ಸಾಧ್ಯವಾಗಲ್ವಾ?
ಹೀಗೊಂದು ಅನುಮಾನದ ಹುಳು ಹೊರಬಿದ್ದ ಬೆನ್ನಲ್ಲೆ, ಅಡಿಕೆ ಸಾಗಾಟದ ಜಾತಕ ಹುಡುಕಾಟ ನಡೆಸಿದಾಗ, ಅಡಿಕೆ ಚೀಲದ ಹಿಂಬದಿಯಿಂದ ಇನ್ನೂರು ಮುನ್ನೂರು ಕೋಟಿ ವಹಿವಾಟು ನಡೆಯುತ್ತಿರುವ ವಿಚಾರಗಳು ಗೊತ್ತಾಗುತ್ತಾ ಹೋದವು.
ವಿತ್ಔಟ್ ಬಿಲ್ನ ಹಿಂದಿದೆ ಚಿದಂಬರ ರಹಸ್ಯ?
ಅಸಲಿಗೆ ಸುಮಾರು ಒಂದು ಕೋಟಿ ಮೌಲ್ಯದ ಅಡಿಕೆಯನ್ನು ಸಾಗಾಟ ಮಾಡುವವರು ನಿರ್ದಿಷ್ಟ ಜಾಗಕ್ಕೆ ತಲುಪಿಸುವ ಜವಾಬ್ದಾರಿಯನ್ನ ಹೊತ್ತಿರುತ್ತಾರೆ. ತಲೆ ಮೇಲೆ ತಲೆ ಬಿದ್ದರೂ, ಲಾರಿ ಸೇರಬೇಕಾದ ಜಾಗ ತಲುಪಿಸುವುದಕ್ಕೆಂದೆ ಭರಪೂರ ಟ್ರಾನ್ಸ್ಪೋರ್ಟ್ ಚಾರ್ಜ್ ನೀಡಲಾಗುತ್ತದೆಯಂತೆ. ಒಂದು ಲಾರಿಗೆ 5 ಲಕ್ಷಕ್ಕೂ ಹೆಚ್ಚು ಟ್ರಾನ್ಸ್ಪೋರ್ಟ್ ಚಾರ್ಜ್ ಪಡೆದುಕೊಂಡವರಿದ್ದಾರೆ.
ಇಲ್ಲಿ ಮೊದಲೇ ಅಡಿಕೆ ಮಾರಾಟಗಾರರು ಹಾಗೂ ಖರೀದಿದಾರರ ನಡುವೆ ಇಷ್ಟು ರೇಟಿಗೆ ಇಷ್ಟು ಅಡಿಕೆ ನೀಡಬೇಕು ಎಂದು ಒಪ್ಪಂದ ಆಗಿರುತ್ತದೆ. ಆ ನಂತರ ರೇಟು ಹೆಚ್ಚಾದರೂ, ಕಡಿಮೆಯಾದರೂ, ಒಪ್ಪಂದದಂತೆಯೇ ಅಡಿಕೆಯನ್ನು ನೀಡಬೇಕು, ಖರೀದಿಸಬೇಕು. ಇದು ಸಾಮಾನ್ಯ ಸಂಗತಿಯಾದರೆ, ಇದರ ಜೊತೆಯಲ್ಲಿಯೇ ಇನ್ನೊಂದು ಒಪ್ಪಂದ ಆಗಿರುತ್ತದೆ. ಅದೇನೆಂದರೆ, ವಿತ್ ಬಿಲ್, ವಿತ್ಔಟ್ ಬಿಲ್ ಅಡಿಕೆ..
ಹೌದು, ಗುಟ್ಕಾ ಫ್ಯಾಕ್ಟರಿಗಳಿಗೆ ಅಡಿಕೆಯನ್ನು ಮಾರುವವರು, ಖರೀದಿದಾರರು ಹೇಳಿದಾಗೆ, ಅಡಿಕೆಯನ್ನು ಕಳುಹಿಸುತ್ತಾರೆ. ವಿತ್ ಬಿಲ್ ಆದರೆ, ಅಧಿಕೃತವಾಗಿ ಅಡಿಕೆ ಫ್ಯಾಕ್ಟರಿ ಸೇರುತ್ತದೆ. ವಿತ್ ಔಟ್ ಬಿಲ್ ಆದರೆ, ಕದ್ದುಮುಚ್ಚಿ ಹೋಗಿ ಫ್ಯಾಕ್ಟರಿ ಸೇರುತ್ತದೆ ಅಡಿಕೆ ಲಾರಿ. ಬೆಳಗಾವಿಯಲ್ಲಿ ಮೊನ್ನೆ ಮೊನ್ನೆ ಸಿಕ್ಕಬಿದ್ದ ಲಾರಿಯು ಕದ್ದುಮುಚ್ಚಿ ಹೋಗುತ್ತಿದ್ದ ಲಾರಿಯಾಗಿತ್ತು.
ಜಿಎಸ್ಟಿ ಅಧಿಕಾರಿಗಳು, ದಾರಿಯಲ್ಲಿ ಅಡ್ಡನಿಂತು, ಇಂತಹ ಲಾರಿಗಳನ್ನು ಹಿಡಿದು ಬಿಲ್ ಕೇಳಿ ಫೈನ್ ಬರೆಯುತ್ತಾರೆ. ಆದರೆ, ಅಡಿಕೆ ನೋಡೋದಕ್ಕೆ ಚಿಕ್ಕದಿದ್ದರೂ, ಅದರಾಚೆಗಿನ ದಂಧೆ ಬೃಹತ್ ಗಾತ್ರದಲ್ಲಿದೆ. ಹೈಟೆಕ್ ವಿವಿಐಪಿ ಪ್ರೊಫೈಲ್ನಲ್ಲಿದೆ ಅನ್ನೋದು ಬಹಳಷ್ಟು ಜನರಿಗೆ ಗೊತ್ತಿರಲಿಕ್ಕಿಲ್ಲ.
ವಿತ್ಔಟ್ ಬಿಲ್ ಅಡಿಕೆಯಿಂದ ಸರ್ಕಾರಕ್ಕೆ 5 ಲಕ್ಷವಷ್ಟೆ ಜಿಎಸ್ಟಿ ವಂಚನೆಯಾಗದು. ಸರಿಸುಮಾರು 300 ಕೋಟಿ ರೂಪಾಯಿ ವಂಚನೆಯ ಮುನ್ನುಡಿ ಈ ಐದು ಲಕ್ಷವಾಗಿರುತ್ತದೆ. ಹೌದು, ಅಕ್ರಮವಾಗಿ ವಿತ್ ಔಟ್ ಬಿಲ್ ಲಾರಿ, ಒಂದು ಕೋಟಿ ಮೌಲ್ಯದ ಅಡಿಕೆಯನ್ನು ಗುಟ್ಕಾ ಫ್ಯಾಕ್ಟರಿಗೆ ತಲುಪಿಸುತ್ತದೆ.
ಅಲ್ಲಿ ಹೋದ ಲಾರಿ ಲೋಡು ಅಡಿಕೆ ಸುಪಾರಿಯಾಗಿ ಮಾರಾಟ ಮಳಿಗೆಗೆ ತಲುಪುವಾಗಲೂ ವಿತ್ ಔಟ್ ಬಿಲ್ ಆಗಿಯೇ ತಲುಪುತ್ತದೆ. ಸರ್ಕಾರಕ್ಕೆ ವಂಚಿಸೋದು ಅಂದರೆ, ಬಹಳಷ್ಟು ಜನರಿಗೆ ಇಷ್ಟ. ಇದೊಂಥರಾ ಅಪ್ಪನ ಜೇಬಿನಿಂದ ಮಗಾ ದುಡ್ಡು ಕದ್ದ ಹಾಗೆ, ತಪಲ್ಲ ಅಂತಾ ಕಳ್ಳರೆ ಅಂದುಕೊಂಡು ಬಿಡ್ತಾರೆ.
ಸರ್ಕಾರಕ್ಕೆ 200-300 ಕೋಟಿ ರೂಪಾಯಿ ವಂಚನೆ?
ಹೀಗೆ ವಿತ್ಔಟ್ ಬಿಲ್ನ ಮೂಲಕ ಅಡಿಕೆ ಬೆಳೆಗಾರನಿಂದ ಫ್ಯಾಕ್ಟರಿಗೆ ಹೊರಟ ಅಡಿಕೆ ಲಾರಿ, ಅಂತಿಮವಾಗಿ ಸುಪಾರಿಯಾಗಿ ಮಾರಾಟ ಮಳಿಗೆ ಸೇರುವರೆಗೂ ವಿತ್ಔಟ್ ಬಿಲ್ ಆಗಿಯೇ ತಲುಪುತ್ತದೆ. ನಿಮಗೆ ಗೊತ್ತಿರಲಿ ಓದುಗರೆ, ವ್ಯಾಪಾರದ ಮಹಾಮೋಸ ನಡೆಯೋದು ಇಲ್ಲಿಯೇ..
ಸಾಮಾನ್ಯವಾಗಿ ಒಂದು ರೂಪಾಯಿ ಮೌಲ್ಯದ ಗುಟ್ಕಾಕ್ಕೆ 200 ಪರ್ಸೆಂಟ್ನಷ್ಟು ಸೆಸ್ ಹಾಕಲಾಗುತ್ತದೆ. ಈ ಲೆಕ್ಕವನ್ನೆ ತೆಗೆದುಕೊಂಡು ಒಂದು ಕೋಟಿ ಮೌಲ್ಯದ ಅಡಿಕೆಯಿಂದ ತಯಾರಿಸಲಾದ ಸುಪಾರಿಗೆ ಎಷ್ಟು ಸೆಸ್ ಬೀಳಬಹುದು ಎಂದು. ಅಂದಾಜಿಗೆ ತೆಗೆದುಕೊಂಡು 200-300 ಕೋಟಿ ರೂಪಾಯಿಯ ವ್ಯಹವಾರ ಇದಾಯ್ತು. ವಿತ್ಔಟ್ ಬಿಲ್ ಎಂದರೆ ಸರ್ಕಾರಕ್ಕೆ ಎಷ್ಟು ನಷ್ಟವಾಯ್ತು ಅನ್ನೋದನ್ನ ಪ್ರತ್ಯೇಕವಾಗಿ ಹೇಳಬೇಕಾ..
ಗುಟ್ಕಾ ಕಂಪನಿಗಳು ಸರ್ಕಾರಕ್ಕೆ 200-300 ಕೋಟಿ ರೂಪಾಯಿಯನ್ನು ವಂಚಿಸುವ ಸಲುವಾಗಿ ವಿತ್ಔಟ್ ಬಿಲ್ ಅಡಿಕೆಗಳನ್ನು ತರಿಸಿಕೊಳ್ಳುತ್ತವೆ. ವಿತ್ ಬಿಲ್ ತಂದರೆ, ಪ್ರತಿಯೊಂದಕ್ಕೂ ಲೆಕ್ಕ ಇಡಬೇಕಾಗುತ್ತದೆ. ಸೆಸ್ ಇಲ್ಲದೆ ಮಾರಲು ಬರುವುದಿಲ್ಲ. ಹಾಗಾಗಿ ವಿತ್ಔಟ್ ಬಿಲ್ ಬಂದರೆ ವಂಚನೆ ಸುಲಭ. ಒಂದು ಪರ್ಮಿಟ್ ಪಡೆದುಕೊಂಡು, ಅದರ ಅವದಿ ಮುಗಿಯುವುದರೊಳಗೆ ಮೂರು ನಾಲ್ಕು ಸಲ ವಿತ್ಔಟ್ ಬಿಲ್ ಗುಟ್ಕಾಗಳನ್ನ ಅಂಗಡಿಗಳಿಗೆ ತಲುಪಿಸಲಾಗುತ್ತದೆ. ಇಲ್ಲಿಂದ ರಿಟೇಲ್ ಮಾರಾಟಕ್ಕೆ ಸರಭರಾಜಾಗುತ್ತದೆ.
ಹೀಗೆ ಆರಂಭದಿಂದ ಅಂತ್ಯದವರೆಗೂ ವಿತ್ಔಟ್ ಬಿಲ್ ಮಾಲ್ನಲ್ಲಿ, ಕೋಟಿಗಟ್ಟಲೇ ರೂಪಾಯಿಗಳನ್ನು ಅಕ್ರಮ ಮುಚ್ಚಿಡಲೆಂದೆ ಚೆಲ್ಲಲಾಗುತ್ತದೆ. ಚೆಕ್ಪೋಸ್ಟ್ಗಳ ಪೊಲೀಸರಿಂದ ಹಿಡಿದು, ಅಧಿಕಾರಿಗಳ ಬಾಯಿಮುಚ್ಚಿಸುವರೆಗೂ, ರಾಜ್ಯದ ಗಡಿ ದಾಟಿಸುವುದರಿಂದ ಹಿಡಿದೂ, ಹೋಲ್ಸೇಲ್ ವ್ಯಾಪಾರಿಗೆ ಕಡಿಮೆ ರೇಟು ನೀಡುವರೆಗೂ ಅಕ್ರಮವಾಗಿಯೇ ವೆಚ್ಚಮಾಡಲಾಗುತ್ತದೆ. ಇಷ್ಟೆಲ್ಲಾ ಖರ್ಚು ಮಾಡಿಯು ಉಳಿವುದು ಕೋಟ್ಯಾನುಕೋಟಿ. ಈತ ಜಿಎಸ್ಟಿ ತಂದಿದ್ದಾನಾ ಇಲ್ವಾ? ತಾನು ಕೊಟ್ಟ ದುಡ್ಡು ಸರ್ಕಾರಕ್ಕೆ ಸೆಸ್ ಆಗಿ ಹೋಗುತ್ತಾ ಅಥವಾ ಅಕ್ರಮ ದಂಧೆಕೋರರಿಗೆ ಹೋಗುತ್ತಾ ಅನ್ನೋದನ್ನ ಗೊತ್ತಿಲ್ಲದೆ ಜನರು ಗುಟ್ಕಾ ಖಾಲಿಮಾಡುತ್ತಲೇ ಇದ್ದಾರೆ.
ರಾಜ್ಯದಲ್ಲಷ್ಟೆ ಹೆಚ್ಚಾಗಿ ನಡೆಯುವ ಅಡಿಕೆ ವಹಿವಾಟಿನಲ್ಲಿ ಈ ಕಾಳದಂಧೆ ಒಂದು ವೃಂದಕೂಟವಾಗಿ ನಡೆಯುತ್ತಿದೆಯಂತೆ. ಅವರು ಇವರಿಗೆ ಇವರು ಅವರಿಗೆ ಸಹಾಯ ಮಾಡುತ್ತಲೇ ಹೈಪ್ರೊಫೈಲ್ ವಹಿವಾಟು ನಡೆಸುವ ಮಂದಿ ಟೆಂಡರ್ನಲ್ಲೂ ಗೋಲ್ಮಾಲ್ ಮಾಡುತ್ತಾರಂತೆ. ಒಬ್ಬ ಜಾದುಗಾರ ಕಣ್ಕಟ್ಟಿನಲ್ಲಿ ಆಟವಾಡಿ, ಜನರನ್ನ ನಂಬಿಸುತ್ತಾರೆ. ಆದರೆ, ಅಡಿಕೆಯ ಮಹಾದಂಧೆಯಲ್ಲಿ ಜನರ ಕಣ್ಮುಂದೆಯೇ ಕಣ್ಕಟ್ಟು ನಡೆಯುತ್ತಿರುತ್ತದೆ. ಆದಾಗ್ಯು ಏನೂ ಮಾಡಲಾಗುವುದಿಲ್ಲ ಎನ್ನುವದೇ ವಿಪರ್ಯಾಸ.