KARNATAKA NEWS/ ONLINE / Malenadu today/ Oct 26, 2023 SHIVAMOGGA NEWS
ಪೊಲೀಸ್ ಕೆಲಸ ಅಂದರೆ ಹೆಣ ಕಾಯುವ ಕೆಲಸ ಎಂಬಂತಹ ಮೂದಲಿಕೆಯ ಮಾತು ಇವತ್ತಿಗೂ ಕೆಲವರ ಬಾಯಲ್ಲಿ ಕೇಳಿಬರುತ್ತದೆ. ಆದರೆ ಪೊಲೀಸ್ ಎಂದು ಪಟ್ಟಿ ಪಡೆದ ಸಮವಸ್ತ್ರದಾರಿ ತನ್ನದೆಲ್ಲವನ್ನೂ ಬದಿಗಿಟ್ಟು ಸಮಾಜಕ್ಕಾಗಿ ಏನೇಲ್ಲಾ ಕೆಲಸ ಮಾಡಬೇಕಾಗಿ ಬರುತ್ತದೆ ಎಂಬುದಕ್ಕೆ ಘಟನೆಯೊಂದು ಸಾಕ್ಷಿಯಾಗಿದೆ.
ಎಲ್ಲೋ ಅನಾಥ ಶವವೊಂದು ಸಿಗುತ್ತದೆ. ಅಂತಹ ಸನ್ನಿವೇಶದಲ್ಲಿ ಯಾರು ಅದರ ಬಗ್ಗೆ ಯೋಚಿಸುವುದಿಲ್ಲ. ಆದರೆ ಪೊಲೀಸರು ನಮಗೇಕೆ ಎನ್ನುವ ಹಾಗಿರುವುದಿಲ್ಲ. ಹೀಗಾಗಿ ಸಿಕ್ಕ ಅನಾಥ ಶವಕ್ಕೊಂದು ಮುಕ್ತಿ ನೀಡಬೇಕಾಗುತ್ತದೆ. ಅದರಲ್ಲಿಯು ಕೊಳೆತ ಸ್ತಿತಿಯಲ್ಲಿ ಸಿಗುವ ಶವವನ್ನು ಒಬ್ಬ ಪೊಲೀಸ್ ಯಾವ ಭಾವನೆಯನ್ನು ತೋರದೆ, ಅದು ಸಿಕ್ಕ ಸ್ಥಳದಿಂದ ಸ್ಥಳಾಂತರ ಮಾಡುತ್ತಾನೆ. ಆನಂತರ ಅದರ ಗುರುತು ಪತ್ತೆಗೆ ಮುಂದಾಗುತ್ತಾನೆ. ಹಾಗೆ ಸಿಕ್ಕ ಗುರುತಿನ ಅಡಿಯಲ್ಲಿ ಮೃತದೇಹದ ವಿಳಾಸ ಹುಡುಕಿ, ಸತ್ತವರ ಸಂಬಂಧಿಕರಿಗೆ ಮೃತದೇಹವನ್ನು ತಲುಪಿಸುತ್ತಾರೆ. ಇಷ್ಟೆಲ್ಲಾ ಆಗುವಾಗ ಒಬ್ಬ ಖಾಕಿ ಎದುರಿಸುವ ಸವಾಲುಗಳು ಆತನಿಗಷ್ಟೆ ಗೊತ್ತಿರುತ್ತದೆ.
ಕೆಲವೊಮ್ಮೆ ಸಿಗುವ ಅನಾಥ ಶವಗಳನ್ನು ಪಡೆದುಕೊಳ್ಳಲು ಯಾರು ಸಹ ಮುಂದೆ ಬರುವುದಿಲ್ಲ. ಅಂತಹ ಸಂದರ್ಭದಲ್ಲಿ ಪೊಲೀಸರೇ ಮೃತಪಟ್ಟವನ ದೇಹಕ್ಕೆ ಅಂತ್ಯಕ್ರಿಯೆಯು ಮಾಡಬೇಕಾಗುತ್ತದೆ. ಸದ್ಯ ಶಿವಮೊಗ್ಗದಲ್ಲಿ ಅಂತಹದ್ದೊಂದು ಘಟನೆ ಮತ್ತೊಮ್ಮೆ ಸಂಭವಿಸಿದೆ.
ದಿನಾಂಕಃ 12-10-2023 ರಂದು ಬೆಳಗ್ಗೆ ಶಿವಮೊಗ್ಗ ನಗರದ ಕೋಟೆ ಪೊಲೀಸ್ ಠಾಣಾ ವ್ಯಾಪ್ತಿಯ ಹೊಳೆ ಬಸ್ ನಿಲ್ದಾಣದ ಹತ್ತಿರದ ಫುಟ್ ಪಾತ್ ನ ಮೇಲೆ ಸುಮಾರು 50 ರಿಂದ 55 ವರ್ಷ ವಯಸ್ಸಿನ ವ್ಯಕ್ತಿ ಈ ಜನ್ಮಕ್ಕೆ ಇಷ್ಟೆ ಎಂಬಂತೆ ಉಸಿರು ಚೆಲ್ಲಿದ್ದ. ಆತ ಅನಾರೋಗ್ಯದಿಂದ ಸಾವನ್ನಪ್ಪಿದ್ನಾ? ಅಥವಾ ಆರೈಕೆ ಸಿಗದೇ ಹಸಿವಿನಿಂದ ಸಾವನ್ನಪ್ಪಿದ್ನಾ? ದೇವರಿಗೆ ಗೊತ್ತು! ಏಕೆಂದರೆ, ಶಿವಮೊಗ್ಗದಲ್ಲಿ ಪ್ರತಿವರ್ಷ ಇಂತಹ ಸನ್ನಿವೇಶದಿಂದಲೇ ಹತ್ತಿರ ಹತ್ತಿರ ನೂರು ಮಂದಿ ಬೀದಿ ಹೆಣವಾಗುತ್ತಿದ್ದಾರೆ. ಈ ಬಗ್ಗೆ ಈ ಹಿಂದೆ ಮಲೆನಾಡು ಟುಡೆ ವರದಿ ಮಾಡಿತ್ತು.
ವಿಚಾರಕ್ಕೆ ಬರುವುದಾದರೆ, ಕೋಟೆ ಪೊಲೀಸ್ ಠಾಣೆಯಲ್ಲಿ ಅಸ್ವಾಭಾವಿಕ ಮರಣ ಪ್ರಕರಣವನ್ನು ಪೊಲೀಸರು ದಾಖಲಿಸಿಕೊಂಡು ಮೃತದೇಹವನ್ನು ಶಿವಮೊಗ್ಗ ನಗರದ ಜಿಲ್ಲಾ ಮೆಗ್ಗಾನ್ ಆಸ್ಪತ್ರೆ ಶವಾಗಾರದ ಶೀಥಲಿಕರಣ ವ್ಯವಸ್ಥೆಯಲ್ಲಿ ಸುರಕ್ಷಿತವಾಗಿ ಇರಿಸಿದ್ದರು.
ಮೇಲಾಗಿ ಪ್ರೋಟೋಕಾಲ್ನಂತೆ, ವ್ಯಕ್ತಿ ಗುರುತು, ಚಹರೆ ಪಟ್ಟಿಮಾಡಿ, ಈ ವ್ಯಕ್ತಿಯ ಬಲಗೈ ಮೇಲೆ MP & ಓಂ ಹಾಗೂ ಎಡ ಗೈ ಮೇಲೆ SM ಎಂಬ ಹಚ್ಚೆ ಗುರುತು ಇರುತ್ತದೆ. ಇವರ ವಾರಸ್ಸುದಾರರು ಯಾರಾದರೂ ಇದ್ದಾರೆಯೇ ಎಂದು ಆಕಾಶ ವಾಣಿ, ದೂರದರ್ಶನ ಮತ್ತು ಪತ್ರಿಕೆಗಳಲ್ಲಿ ಪ್ರಕಟಣೆ ನೀಡಿದ್ದರು.
ಸಂಬಂಧಪಟ್ಟವರು ಇದ್ದಾರೋ? ಅಥವಾ ಅವರಿಗಿವರು ಬೇಡವಾಗಿದ್ದರೋ? ಗೊತ್ತಿಲ್ಲ. ಆದರೆ 25 ನೇ ತಾರೀಖಿನವರೆಗೂ ಮೃತದೇಹವನ್ನು ಸುಪರ್ದಿಗೆ ತೆಗೆದುಕೊಳ್ಳಲು ಯಾರು ಬಂದಿರಲಿಲ್ಲ. ಹೀಗಾಗಿ ಕೋಟೆ ಪೊಲೀಶ್ ಠಾಣೆ (kote police station shivamogga ) PSI ಕುಮಾರ್ ಹಾಗೂ ಸಿಬ್ಬಂದಿ ಖುದ್ದಾಗಿ ನ್ಯೂ ಮಂಡ್ಲಿ ಸ್ಮಶಾನದಲ್ಲಿ ಹೆಸರೇ ಗೊತ್ತಿಲ್ಲದ ವ್ಯಕ್ತಿಯ ಅಂತ್ಯಸಂಸ್ಕಾರ ನಡೆಸಿದ್ದಾರೆ. ಕ್ರಿಯಾವಿದಿಗಳಂತೆ ಅನಾಥನಿಗೆ ಪೊಲೀಸರೇ ಸಂಬಂಧಿಗಳಾಗಿ ಹಿಡಿಮಣ್ಣು ಹಾಕಿದ್ದಾರೆ. ಇದನ್ನ ಸಾಕ್ಷಿಕರಿಸುತ್ತಾ ಫೋಟೋ ತೆಗೆಯುವಾತ, ವಿಧಿಯಾಟದಲ್ಲಿ ಯಾರು ಬಂಧುಗಳೋ ! ಯಾರು ಶತ್ರುಗಳು? ಎನ್ನುತ್ತಿದ್ದರೇ, ಸ್ಮಶಾನದ ಮೌನ ಇದೇ ಕೊನೆ ನಿಲ್ದಾಣ ಎನ್ನುವಂತಿತ್ತು.
ಇನ್ನಷ್ಟು ಸುದ್ದಿಗಳು
ಆಸ್ಪತ್ರೆ Appointment ಗಾಗಿ 10 ರೂಪಾಯಿ Pay ಮಾಡಿದ ವ್ಯಕ್ತಿಗೆ ಕಾದಿತ್ತು ಶಾಕ್!
ಶಿವಮೊಗ್ಗ ಕೇಂದ್ರ ಕಾರಾಗೃಹದ ಮೇಲೆ ರೇಡ್ | ಸಿಕ್ತು ಮಂಗಳೂರು ಸ್ಪೇಷಲ್ 93 ಬೀಡಿ | ಕಾರ್ಬನ್ ಮೊಬೈಲ್!
