ಮಲೆನಾಡು ಟುಡೆ ಸುದ್ದಿ / ಸಾಗರ / ಸಾಗರ ನಗರಸಭೆಯ 18ನೇ ವಾರ್ಡ್ ಗಾಂಧಿನಗರದಲ್ಲಿರುವ ಸ್ವಾಮಿ ವಿವೇಕಾನಂದ ಗ್ರಂಥಾಲಯ ಆವರಣದ ಸಾರ್ವಜನಿಕ ಬಾವಿ ವಿಚಾರ ಇದೀಗ ಮತ್ತೊಂದು ಹಂತದ ರಾಜಕೀಯ ಆರೋಪ-ಪ್ರತ್ಯಾರೋಪಕ್ಕೆ ಕಾರಣವಾಗಿದೆ. ಈ ಮಧ್ಯೆ ಬಾವಿಗೂ ತಮಗೂ ಯಾವುದೇ ಸಂಬಂಧವಿಲ್ಲ ಎಂದು ಸಾಗರ ಶಾಸಕ ಬೇಳೂರು ಗೋಪಾಲಕೃಷ್ಣ ಸ್ಪಷ್ಟಪಡಿಸಿದ್ದಾರೆ.
ಮಾನನಷ್ಟಕ್ಕೆ ಕಾರಣವಾಯ್ತು ‘ಬಾವಿ ಪಾಲಿಟಿಕ್ಸ್’
ಬಾವಿ ಪಾಲಿಟಿಕ್ಸ್ ಬಗ್ಗೆ ಇವತ್ತು ಬಾವಿ ಪುರಾಣದ ಬಗ್ಗೆ ಖುದ್ದು ಫೀಲ್ಡ್ಗೆ ಇಳಿದು ಮಾತನಾಡಿದ ಶಾಸಕ ಬೇಳೂರು ಗೋಪಾಲಕೃಷ್ಣ ತಮ್ಮ ಮನೆಯ ಪಕ್ಕದಲ್ಲಿರುವ ಈ ಬಾವಿ ಸಾಗರ ನಗರಸಭೆಗೆ ಸೇರಿದ ಸರ್ಕಾರಿ ಬಾವಿಯಲ್ಲ. ದಾಖಲೆಗಳ ಪ್ರಕಾರ ಇದು ಸರ್ಕಾರಿ ಬಾವಿ ಅಲ್ಲ ಎಂಬುದಕ್ಕೆ ಸಾಕ್ಷ್ಯವಿದೆ ಎಂದರು. ಅಲ್ಲದೆ ಸುಮಾರು 40 ವರ್ಷಗಳಿಂದ ಬಳಕೆಯಲ್ಲಿದ್ದ ಈ ಬಾವಿ ಗಾಂಧಿನಗರ ನಿವಾಸಿಗಳಿಗೆ ನೀರಿನ ಆಧಾರವಾಗಿತ್ತು ಎಂಬುದು ಸತ್ಯ! ಆದರೆ ಬಾವಿ ಮುಚ್ಚಲು ನಾನು ಕಾರಣನಲ್ಲ ಎಂದಿದ್ದಾರೆ.
ಇನ್ನೂ ನಾನು ಸಾಮಾನ್ಯ ಶಾಸಕನಾಗಿ ಸಾರ್ವಜನಿಕ ಬಾವಿಯನ್ನು ಮುಚ್ಚುವ ಕೆಲಸ ಮಾಡುವುದಿಲ್ಲ. ಈ ಬಾವಿಯನ್ನು ಮುಚ್ಚುವ ಮೊದಲು ಮತ್ತೊಂದು ಬಾವಿಯನ್ನು ತೆಗೆಸಲಾಗಿದೆ. ಆದರೂ ನನ್ನ ವಿರುದ್ಧ ಅಪಪ್ರಚಾರ ಮಾಡುವ ಕೆಲಸ ನಡೆಯುತ್ತಿದೆ ಎಂದು ಆರೋಪಿಸಿದರು. ಮಾಜಿ ಶಾಸಕ ಹರತಾಳು ಹಾಲಪ್ಪ ಅವರು ಎರಡ್ಮೂರು ಬಾರಿ ತಮ್ಮ ವಿರುದ್ಧ ಅಪವಾದ ಮೂಡುವಂತೆ ನಡೆದುಕೊಂಡಿದ್ದಾರೆ. ಈ ಬಾವಿ ವಿಚಾರವನ್ನು ರಾಜಕೀಯಗೊಳಿಸುವ ಉದ್ದೇಶದಿಂದ ತಮ್ಮ ಮನೆ ಸಮೀಪಕ್ಕೆ ಬಂದು ಪ್ರತಿಭಟನೆ ನಡೆಸಿದ್ದಾರೆ . ಇತಿಹಾಸವಿರುವ ಕೆರೆಯನ್ನೇ ಒತ್ತುವರಿ ಮಾಡಿದ್ದಾರೆ. ಅಂತಹವರು ನಾನು ಬಾವಿ ಮುಚ್ಚಿದ್ದೇನೆ ಎಂದು ಆರೋಪಿಸುತ್ತಿದ್ದಾರೆ ಎಂದು ಹೇಳಿದರು.
ಚುನಾವಣೆ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ರಾಜಕೀಯವಾಗಿ ಗುರುತಿಸಿಕೊಳ್ಳಲು ಈ ರೀತಿಯ ಕುತಂತ್ರ ಮಾಡಲಾಗಿದೆ ಎಂದು ಆರೋಪಿಸಿದ ಬೇಳೂರು ಗೋಪಾಲಕೃಷ್ಣ, ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಜಿ ಶಾಸಕ ಹರತಾಳು ಹಾಲಪ್ಪ ಸೇರಿದಂತೆ ಒಟ್ಟು 4 ಜನರ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಲಾಗುವುದು ಎಂದರು.
