ಮಲೆನಾಡು ಟುಡೆ ಸುದ್ದಿ / ಶಿವಮೊಗ್ಗ : ಹಾವುಗಳು ಮನೆಯಲ್ಲಿ ಸಿಲಿಂಡರ್ನ ಕೆಳಭಾಗದಲ್ಲಿ, ಶೂನಲ್ಲಿ, ಬೈಕ್ ನ ಸ್ಪೇರ್ ಪಾರ್ಟ್ನಲ್ಲಿ – ಹೀಗೆ ಅನೇಕ ಪ್ರದೇಶಗಳಲ್ಲಿ ಅಡಗಿ ಕುಳಿತಿರುವುದನ್ನು ನೀವು ಕೇಳಿರ್ತೀರ, ಸಾಮಾನ್ಯವಾಗಿ ನೋಡಿಯೂ ಇರ್ತೀರ. ಆದ್ರೆ, ಬಸ್ಸೊಂದರ ವೀಲ್ ಒಳಗೆ ಹಾವು ಅಡಗಿ ಕುಳಿತಿದ್ದನ್ನು ಎಂದಾದರು ಕೇಳಿದ್ದೀರ? ಈ ವಿಚಾರ ಆಶ್ಚರ್ಯ ಅನಿಸಬಹುದು, ಆಶ್ಚರ್ಯ ಅನಿಸಿದ್ರೂ ಇದು ಸತ್ಯ. ಬಸ್ನ ವೀಲ್ ಒಂದರಲ್ಲಿ ಕೆರೆಹಾವು ಅಡಗಿ ಕುಳಿತಿರುವ ಅಪರೂಪದ ಘಟನೆ ಶಿವಮೊಗ್ಗದಲ್ಲಿ ನಡೆದಿದೆ.
ಹೌದು, ಶಿವಮೊಗ್ಗದ ಕೆಎಸ್ ಆರ್ ಟಿಸಿ ಡಿಪೋದಲ್ಲಿದ್ದ ಬಸ್ಸೋಂದರ ವೀಲ್ ಒಳಗೆ ವಿಷ ರಹಿತ ಕೆರೆ ಹಾವು ಅಡಗಿ ಕುಳಿತಿದ್ದು ವೀಲ್ ಚೆಕ್ ಮಾಡುವಾಗ ಇದು ಸಿಬ್ಬಂದಿಗಳ ಗಮನಕ್ಕೆ ಬಂದಿದೆ. ಈ ಸಂಬಂಧ ಸಿಬ್ಬಂದಿಗಳು ಕೂಡಲೇ ಉರಗ ರಕ್ಷಕ ಸ್ನೇಕ್ ಕಿರಣ್ರಿಗೆ ಫೋನ್ ಮಾಡಿದ್ದಾರೆ.
ಫೋನ್ ಮಾಡಿದ ತಕ್ಷಣವೇ ಉರಗ ರಕ್ಷಕ ಸ್ನೇಕ್ ಕಿರಣ್ ಸ್ಥಳಕ್ಕೆ ಬಂದಿದ್ದಾರೆ. ಬಂದು ನೋಡಿದಾಗ ಹಾವು ವೀಲ್ ಒಳಗೆ ಕುಳಿತಿರುವುದು ಕಂಡುಬಂದಿದೆ. ಕೂಡಲೇ ಕೆಳಗಿಳಿದು ಸತತವಾಗಿ ಕಾರ್ಯಾಚರಣೆ ನಡೆಸಿ, ಸುರಕ್ಷಿತವಾಗಿ ಹಾವನ್ನು ಹೊರಗೆ ತೆಗೆದಿದ್ದಾರೆ.
ಹೊರ ತೆಗೆದ ಕೂಡಲೇ ಹಾವು ಓಡಲು ಆರಂಭಿಸಿತು. ಒಂದೆರಡು ಬಾರಿ ಸ್ನೇಕ್ ಕಿರಣ್ರವರಿಗೆ ಕಚ್ಚಲು ಸಹ ಪ್ರಯತ್ನಿಸಿತು. ಆದರೂ ಸಹ ಅದನ್ನು ಹಿಡಿಯುವಲ್ಲಿ ಸ್ನೇಕ್ ಕಿರಣ್ ಯಶಸ್ವಿಯಾದರು. ಈ ಕಾರ್ಯಾಚರಣೆಯನ್ನು ನೋಡುತ್ತಾ ನಿಂತಿದ್ದ ಸಿಬ್ಬಂದಿಗಳು ಕೂಡ ಕೆಲ ಕಾಲ ಕಂಗಾಲಾದರು. ಕೆಲವರು, ಅಯ್ಯೋ ಕಚ್ಚೇ ಬಿಡ್ತು, ನಾಗರ ಹಾವು ಇರ್ಬೋದೇನೋ ಅಂತಿದ್ರೆ, ಇನ್ ಕೆಲವರು, ಏ ಅದು ಕಚ್ಚಲ್ಲ, ಬಾಲದಲ್ಲೇ ಹೊಡೆಯೋದು ಅಂತ ಮಾತಾಡ್ಕೋತಿದ್ದ ದೃಶ್ಯ ಅಲ್ಲಿ ಕಂಡುಬಂತು. ಒಟ್ನಲ್ಲಿ ಆ ಸ್ಥಳದಲ್ಲಿದ್ದ ಸಿಬ್ಬಂದಿಗಳು ಭಯ-ಕುತೂಹಲದಿಂದ ನೋಡುತ್ತಾ, ಕೂಗುತ್ತಾ ನಿಂತಿದ್ದರೆ, ಇತ್ತ ಹಾವು ಬಡ ಜೀವ ಬದುಕೋತು ಅಂತ ಕಾಡು ಸೇರ್ತು.
