ಇದು ಅಂತಿಂಥಾ ಬೇಟೆಯಲ್ಲ! ಮೂರು ಜೀವದ ದಮ್ ಬೇಕು! Shivamogga culture tourist information
ಮಲೆನಾಡು ಟುಡೆ ಸುದ್ದಿ / ಶಿವಮೊಗ್ಗ / ಮಲೆನಾಡಿನ ಅಪ್ಪಟ ಗ್ರಾಮೀಣ ಕ್ರೀಡೆ ಕೆರೆಬೇಟೆಯು ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲ್ಲೂಕಿನ ಚಿಟ್ಟೂರು ಗ್ರಾಮದಲ್ಲಿ ಗುರುವಾರ ಅತ್ಯಂತ ಸಂಭ್ರಮದಿಂದ ಜರುಗಿತು. ಮಳೆಗಾಲದ ಅವಧಿಯಲ್ಲಿ ಕೆರೆಗಳಿಗೆ ಮೀನಿನ ಮರಿಗಳನ್ನು ಬಿಡುವುದು ವಾಡಿಕೆ. ತದನಂತರ, ಬೇಸಿಗೆಯ ಬಿಸಿಲಿಗೆ ಕೆರೆಯಲ್ಲಿನ ನೀರಿನ ಮಟ್ಟ ಕಡಿಮೆಯಾಗಿ ಬತ್ತಲಾರಂಭಿಸಿದಾಗ, ಗ್ರಾಮಸ್ಥರೆಲ್ಲರೂ ಒಗ್ಗೂಡಿ ಈ ಮೀನು ಶಿಕಾರಿಯನ್ನು ಆಯೋಜಿಸುತ್ತಾರೆ. ಈ ಸಂಪ್ರದಾಯದಂತೆ ಚಿಟ್ಟೂರಿನಲ್ಲಿ ಏರ್ಪಡಿಸಲಾಗಿದ್ದ ಕೆರೆಬೇಟೆಯಲ್ಲಿ ಏಕಕಾಲದಲ್ಲಿ ಸಾವಿರಾರು ಜನರು ಕೆರೆಗಿಳಿದು ಮೀನು ಹಿಡಿಯುವ ದೃಶ್ಯವು ನೋಡುಗರ ಗಮನ ಸೆಳೆಯಿತು. ಈ ಅಪರೂಪದ ಕ್ಷಣಗಳನ್ನು ಕಣ್ತುಂಬಿಕೊಳ್ಳಲು ನೂರಾರು ಸಂಖ್ಯೆಯಲ್ಲಿ ಜನರು ಆಗಮಿಸಿದ್ದರು.
ಗ್ರಾಮದಲ್ಲಿ ಮೀನು ಶಿಕಾರಿಯನ್ನು ಸಾರಿದ ಕೂಡಲೇ ಸ್ಥಳೀಯರಲ್ಲಿ ಎಲ್ಲಿಲ್ಲದ ಸಡಗರ ಮನೆಮಾಡಿತ್ತು. ಚಿಟ್ಟೂರು ಗ್ರಾಮಸ್ಥರು ಮಾತ್ರವಲ್ಲದೆ ಸುತ್ತಮುತ್ತಲಿನ ಹಳ್ಳಿಗಳ ಜನರು ಕೂಡ ಯಾವುದೇ ಜಾತಿ ಮತ್ತು ಧರ್ಮದ ಭೇದಭಾವವಿಲ್ಲದೆ ಈ ಗ್ರಾಮೀಣ ಕ್ರೀಡೆಯಲ್ಲಿ ಪಾಲ್ಗೊಂಡರು. ಹಿರಿಯರು ಹಾಗೂ ಕಿರಿಯರು ಎಂಬ ವಯಸ್ಸಿನ ಅಂತರವಿಲ್ಲದೆ ಪ್ರತಿಯೊಬ್ಬರೂ ಮೀನು ಹಿಡಿಯುವ ಕಾಯಕದಲ್ಲಿ ಉತ್ಸಾಹದಿಂದ ತೊಡಗಿಸಿಕೊಂಡರು. ಈ ಬಾರಿಯ ಕೆರೆಬೇಟೆಯಲ್ಲಿ ಮೀನು ಹಿಡಿಯಲು ಕೇವಲ ಕುಣಿಯನ್ನು ಮಾತ್ರ ಬಳಸಲು ಅವಕಾಶ ಕಲ್ಪಿಸಲಾಗಿತ್ತು. ವಿಶೇಷವೆಂದರೆ, ಸಾಂಪ್ರದಾಯಿಕವಾಗಿ ಬಳಸಲಾಗುತ್ತಿದ್ದ ಬಿದಿರಿನ ಕುಣಿಗಳ ಜೊತೆಗೆ ಕಬ್ಬಿಣದ ಕುಣಿಗಳನ್ನು ಸಹ ಹೆಚ್ಚಿನ ಸಂಖ್ಯೆಯಲ್ಲಿ ಮೀನುಗಾರಿಕೆಗೆ ಉಪಯೋಗಿಸಲಾಯಿತು.
ಬೆಳಗಿನಿಂದಲೇ ಆರಂಭವಾದ ಈ ಭರ್ಜರಿ ಮೀನು ಬೇಟೆಯಲ್ಲಿ ಹಲವರ ಕೈಗೆ ಬೃಹತ್ ಗಾತ್ರದ ಮೀನುಗಳು ಸಿಕ್ಕವು. ಕೆಲವರು ಸುಮಾರು 5 ಕೆ.ಜಿ. ವರೆಗಿನ ತೂಕದ ಮೀನುಗಳನ್ನು ಹಿಡಿದು ಬೀಗಿದರೆ, ಇನ್ನು ಕೆಲವರು ಸಣ್ಣಪುಟ್ಟ ಮೀನುಗಳನ್ನು ಹಿಡಿದು ತೃಪ್ತಿಪಟ್ಟುಕೊಂಡರು. ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಜನಸ್ತೋಮ ಸೇರಿದ್ದರೂ, ಗ್ರಾಮ ಸಮಿತಿಯ ಸದಸ್ಯರು ಇಡೀ ಕಾರ್ಯಕ್ರಮವನ್ನು ಅತ್ಯಂತ ಅಚ್ಚುಕಟ್ಟಾಗಿ ನಿರ್ವಹಿಸಿದರು. ಮೀನು ಹಿಡಿಯುವ ಸ್ಥಳದಲ್ಲಿ ಯಾವುದೇ ರೀತಿಯ ಗಲಾಟೆ, ವಾಗ್ವಾದ ಹಾಗೂ ಗೊಂದಲಗಳಿಗೆ ಆಸ್ಪದ ನೀಡದಂತೆ ಎಚ್ಚರವಹಿಸುವ ಮೂಲಕ ಸಮಿತಿಯವರು ಶಿಸ್ತುಬದ್ಧವಾಗಿ ಕೆರೆಬೇಟೆಯನ್ನು ಯಶಸ್ವಿಗೊಳಿಸಿದರು.
Chitturu Kere Bete, Soraba fish hunting, Shivamogga rural sports, traditional fishing Karnataka, Kooni fishing, big fish catch Kannada, Malenadu Today news, village fishing festival #KereBete #Soraba #Chitturu #FishHunting #ShivamoggaNews #TraditionalFishing #RuralSports #KannadaNews #FishingFestival