ಮಲೆನಾಡು ಟುಡೆ ಸುದ್ದಿ | ಶಿವಮೊಗ್ಗ | ಯೂಟ್ಯೂಬ್‌ನಲ್ಲಿ ಕಂಡ ಫರ್ನಿಚರ್ ಜಾಹೀರಾತನ್ನು ನಂಬಿ ಡ್ರೆಸ್ಸಿಂಗ್ ಟೇಬಲ್ ಬುಕ್ ಮಾಡಲು ಹೋದ ಮಹಿಳೆಯೊಬ್ಬರು ಬರೊಬ್ಬರಿ 1,70,000 ಹಣ ಕಳೆದುಕೊಂಡು ಆನ್‌ಲೈನ್ ವಂಚನೆಗೆ ಒಳಗಾಗಿದ್ದಾರೆ.
ಹೊಸನಗರದ ಮಹಿಳೆಯೊಬ್ಬರು ಆಗಸ್ಟ್ 22 ರಂದು ಯೂಟ್ಯೂಬ್ ನೋಡ್ತಿದ್ದ ವೇಳೆ Luxury@furniture showroom4ಎಂಬ ವಿಡಿಯೋ ಕಾಣಿಸಿದೆ, ಅದರಲ್ಲಿ ವಾಟ್ಸಾಪ್ ಬುಕಿಂಗ್‌ಗಾಗಿ ನೀಡಲಾಗಿದ್ದ ಮೊಬೈಲ್ ಸಂಖ್ಯೆಗೆ ದೂರುದಾರರು ಡ್ರೆಸ್ಸಿಂಗ್ ಟೇಬಲ್ ಚಿತ್ರವನ್ನು ಕಳುಹಿಸಿದ್ದಾರೆ. 3,500 ಬೆಲೆ ನಿಗದಿಪಡಿಸಿದ ವಂಚಕರು, ಶೇ. 50 ರಷ್ಟು ಮುಂಗಡ ಹಣ ಪಾವತಿಸುವಂತೆ ಕ್ಯೂಆರ್ ಕೋಡ್ ಕಳುಹಿಸಿ ಹಣ ವರ್ಗಾವಣೆ ಮಾಡಿಸಿಕೊಂಡಿದ್ದಾರೆ.
ತದನಂತರ ಆರ್ಡರ್ ಬುಕ್ ಆಗಿಲ್ಲ ಎಂದು ನೆಪ ಹೇಳಿ, ಹಂತ ಹಂತವಾಗಿ ನಕಲಿ ಟೆಕ್ಸ್ಟ್ ಮೆಸೇಜ್‌ಗಳನ್ನು ಕಳುಹಿಸುವ ಮೂಲಕ ಒಟ್ಟು 1,70,000 ಹಣವನ್ನು ತಮ್ಮ ಖಾತೆಗೆ ವರ್ಗಾಯಿಸಿಕೊಂಡು ವಂಚಿಸಿದ್ದಾರೆ. ತಮ್ಮ ಖಾತೆಯಿಂದ ಹಣ ಹೋದರೂ ಫರ್ನಿಚರ್ ತಲುಪದೇ ಮೋಸ ಹೋಗಿರುವುದು ಅರಿವಿಗೆ ಬಂದ ತಕ್ಷಣ, ಮಹಿಳೆಯು ಶಿವಮೊಗ್ಗ ಸಿಇಎನ್ ಪೊಲೀಸ್ ಠಾಣೆಯಲ್ಲಿ ದೂರನ್ನು ದಾಖಲಿಸಿದ್ದಾರೆ.
