ಶಿವಮೊಗ್ಗದಲ್ಲಿ ಮೂರು ಕಡೆ ನಗರಪಾಲಿಕೆಯ ವಲಯ ಕಚೇರಿ ಓಪನ್!‌ ಎಲ್ಲೆಲ್ಲಿ? ಯಾವೆಲ್ಲಾ ಸೌಲಭ್ಯ ಸಿಗಲಿದೆ!?

SHIVAMOGGA| MALENADUTODAY NEWS | ಮಲೆನಾಡು ಟುಡೆ  Mar 16, 2025 ‌‌ ‌‌

ಶಿವಮೊಗ್ಗ ಮಹಾನಗರ ಪಾಲಿಕೆಯು ಇನ್ಮುಂದೆ ಮೂರು ವಲಯ ಕಚೇರಿಗಳನ್ನು ಹೊಂದಲಿದೆ. ಈ ಸಂಬಂಧ ಇವತ್ತು ಪಾಲಿಕೆ ಗುರುತಿಸಿದ ಕಟ್ಟಡಗಳಿಗೆ ಪಾಲಿಕೆಯಿಂದ ಅಗತ್ಯ ಸಾಮಗ್ರಿ ಹಾಗೂ ದಾಖಲೆಗಳು ಶಿಫ್ಟ್‌ ಆಗಲಿದೆ. 

ಶಿವಮೊಗ್ಗ ಪಾಲಿಕೆಯಲ್ಲಿ ಪ್ರತಿದಿನ ತಮ್ಮದೆ ಅಗತ್ಯ ಕೆಲಸಗಳಿಗಾಗಿ ಸಾವಿರಾರು ಜನರು ಬರುವುದರಿಂದ ಅಧಿಕಾರಿಗಳ ಮೇಲೆ ಕಾರ್ಯದೊತ್ತಡ ಹೆಚ್ಚಾಗುತ್ತಿತ್ತು. ಮೇಲಾಗಿ ದೂರದಿಂದ ಬರುವ ಜನರಿಗೆ ತ್ರಾಸಾಗುತ್ತಿತ್ತು. ಹೀಗಾಗಿ ಸರ್ಕಾರಿ ಸೌಲಭ್ಯ ಸುಲಭವಾಗಿ ಸಿಗುವಂತೆ ಆಗಲು ವಲಯ ಕಚೇರಿಗಳನ್ನ ಸ್ಥಾಪಿಸಬೇಕು ಎಂಬ ಬೇಡಿಕೆ ಕೇಳಿಬಂದಿತ್ತು. 

ಇನ್ನೂ ಈ ಹಿಂದೆ ವಲಯ ಕಚೇರಿ ಸ್ಥಾಪನೆಗೆ ಪ್ರಯತ್ನ ನಡೆದಿದ್ದವಾದರೂ, ಅದು ಕಾರ್ಯಸಾಧುವಾಗಿರಲಿಲ್ಲ. ಪ್ರಸ್ತುತ ಆಯುಕ್ತರಾದ ಕವಿತ ಯೋಗಪ್ಪನವರ್‌ ಅವಧಿಯಲ್ಲಿ ನಗರದ ಮೂರು ಕಡೆ ವಲಯ ಕಚೇರಿ ಸ್ಥಾಪನೆ ಸಂಬಂಧ ಪ್ರಯತ್ನಗಳು ನಡೆದು ಕಚೇರಿ ಗುರುತು ಮಾಡಿ, ಅಗತ್ಯ ಸೌಲಭ್ಯಗಳನ್ನು ಒದಗಿಸುವ ಕೆಲಸ ಪೂರ್ಣಗೊಂಡಿದೆ. ಇವತ್ತಿನಿಂದ ಈ ವಲಯ ಕಚೇರಿಗಳಿಗೆ ಆಯಾ ವಲಯ ಕಚೇರಿಯ ವ್ಯಾಪ್ತಿಗೆ ಬರುವ ಪ್ರದೇಶಗಳ ಖಾತೆಗಳು, ವಿವಿಧ ದಾಖಲೆಗಳು, ಅಗತ್ಯ ಸಾಮಗ್ರಿಗಳನ್ನು ಪಾಲಿಕೆಯ ಕಚೇರಿಯಿಂದ ಶಿಪ್ಟ್‌ ಮಾಡುವ ಕೆಲಸ ಆರಂಭವಾಗಿದೆ. 

ಎಲ್ಲೆಲ್ಲಿ ಕಚೇರಿ?

ಶಿವಮೊಗ್ಗ ಪಾಲಿಕೆಯನ್ನು ಹೊರತು ಪಡಿಸಿ ಒಟ್ಟು ಮೂರು ವಲಯ ಕಚೇರಿಗಳನ್ನು ನಿರ್ಮಿಸಲಾಗಿದೆ. ಆ ಪೈಕಿ ಮೊದಲ ಕಚೇರಿ ಸೀನಪ್ಪ ಶೆಟ್ಟಿ ಸರ್ಕಲ್‌ ಬಳಿ ಇರುವ ಅನ್ಮೋಲ್‌ ಹಿಂಭಾಗದಲ್ಲಿರುವ ಪಾಲಿಕೆಗೆ ಸೇರಿದ ಆಶ್ರಯ ಸಮಿತಿ ಕಟ್ಟಡದಲ್ಲಿ ನಿರ್ಮಾಣ ಮಾಡಲಾಗುತ್ತಿದೆ. 

ಇನ್ನೊಂದು ಕಚೇರಿ ಶಿವಮೊಗ್ಗದ ಬೈಪಾಸ್‌ ರಸ್ತೆಯನ್ನು ಕೂಡಿಕೊಳ್ಳುವ ಇಮಾಮ್‌ ಬಾಡಾದ ಬಳಿ ತುಂಗಾ ನದಿ ಸಮೀಪದಲ್ಲಿರುವ ಪಾಲಿಕೆ ಕಟ್ಟಡದಲ್ಲಿ ಆರಂಭಿಸಲಾಗುತ್ತಿದೆ. 

ಮತ್ತೊಂದು ಕಚೇರಿಯನ್ನು ವಿನೋಬನಗರದ ವ್ಯಾಪ್ತಿಯಲ್ಲಿ ಶುಭಮಂಗಳ ರಸ್ತೆಯಲ್ಲಿ ಸಿಗುವ ಪಾಲಿಕೆಯ ಕಟ್ಟಡದಲ್ಲಿ ಆರಂಭಿಸಲಾಗುತ್ತಿದೆ. 

ಮೂರು ಕಟ್ಟಡಗಳು ಪಾಲಿಕೆಗೆ ಸೇರಿದ ಜಾಗಗಳಾಗಿವೆ. ಇನ್ನೂ ಈ ಕಚೇರಿಗಳಲ್ಲಿ ಯಾವ ಎರಿಯಾಗಳಿಗೆ ಸಂಬಂಧಿಸಿದ ಸೇವೆಗಳು ಸಿಗಲಿವೆ ಎಂಬುದನ್ನು ಸ್ವತಃ ಪಾಲಿಕೆಯೆ ಜನರಿಗೆ ತಿಳಿಸುವ ಕೆಲಸ ಮಾಡಲಿದೆ. ಇದಲ್ಲದೆ ಪಾಲಿಕೆಯು ಸೇರಿದಂತೆ ಎಲ್ಲಾ ಕಚೇರಿಗಳಿಗೂ ಸಮಾನವಾಗಿ ಕೆಲಸಗಳು ಹಂಚಿಕೆಯಾಗಲಿದೆ. ವಲಯ ಕಚೇರಿಯಗಳಲ್ಲಿ ಆಯಾ ಎರಿಯಾದ ಕಂದಾಯ ಇಲಾಖೆ ಹಾಗೂ ಇಂಜಿನಿಯರಿಂಗ್‌ ವಿಭಾಗದ ಕೆಲಸಗಳು ಆರಂಭದ ಹಂತದಲ್ಲಿ ಕೈಗೊಳ್ಳಲಾಗುತ್ತಿದೆ. 

ಒಟ್ಟಾರೆ, ಜನರ ಅನುಕೂಲಕ್ಕಾಗಿ ನಗರಪಾಲಿಕೆಯ ಮೂರು ವಲಯ ಕಚೇರಿಗಳು ಆರಂಭವಾಗುತ್ತಿದ್ದು, ಇದರಿಂದ ಸಾರ್ವಜನಿಕರಿಗೆ ಯಾವ ರೀತಿಯಲ್ಲ ಉಪಯೋಗವಾಗಲಿದೆ ಎಂಬುದು ಇನ್ನಷ್ಟೆ ಗೊತ್ತಾಗಲಿದೆ.